A-giâu Ê Tâi-gí-tsām: 拍電動 ê 好所在

兩三冬前，佇網路頂看著有人挑戰用 50 條命耍「紺色ê屁窒仔Rockman」，對第一代耍到第十代，閣有 SFC ê R&F，攏總 11 項。而且，伊閣是用原本ê主機 (FC, SFC, SS, Xbox 360)，按呢耍規工，實在是不止仔厚工。這是我第一擺知影有人遮爾認真咧拍電動，無親像我，攏是用 EMU 偷食步，干焦想欲破關。這嘛是我第一擺知影 Twitch 這个網站。

佇舊年，這个實況主佇板橋開一間店，佇這个所在，會使耍著足濟較早 ê 電動。當然，遮嘛有現此時上新 ê 主機。毋過，我較佮意 ê 是較古早 ê 主機。新 ê 主機真容易買著，舊 ê 就無遐爾仔簡單矣。

佇遮，逐家會使揣著囡仔時 ê 記持。咱細漢ê時陣，檢采有人電動予爸母擲㧒捔，抑是借朋友了後就 phàng-kìnn拍毋見，嘛有可能是細漢 ê 時陣無法度過關，足毋甘願。攏會使來遮𨑨迌，會當揣著懷念 ê 電動，嘛會使揣魔王報仇。閣較特別 ê 是佇遮會使體驗實況，試看覓做實況主是啥乜款感覺，會使用這个機會推捒遊戲，嘛會使佮逐家破豆，閣會使來展一下仔技術。閣較重要 ê 是，來遮會使熟似誠濟仝款對拍電動有趣味 ê 人。所以，毋管是愛拍電動，抑是想欲交朋友，抑是技術真好想欲展一下，攏會使來試看覓。